Татарстан Республикасы Гражданнар оборонасы эшләре һәм гадәттән тыш хәлләр министрлыгы

Янгыннар “йөгәнләнде”

2014 елның 16 гыйнвары, пәнҗешәмбе

Максатчан һәм юнәлешле эшләү нәтиҗәсендә районда янгыннар белән хәлне тотрыклыландыруга ирешелде.

Узган елда барлыгы 39 янгын чыгу очрагы теркәлде. Бу алдагы елның шул вакыты белән чагыштырганда 8гә, ягъни 17 процентка кимрәк. Ә 9 айда 22 процентка күбрәк иде әле. Ялкын телләре салган зыян 50 процентка кимеп, 1,6 миллион сумга якын тәшкил итте. Алар тагын да азрак булсын иде, чөнки һәр янгын күпме авырлык, бәхетсезлек китерә. Былтыр ут 6 торак йортны, 18 корылманы, 2 эскерт печәнне һәм 1 автомобильне “йотты”, тагын 10 йортны, 15 корылманы өлешчә җимерде. Аларда 3 кешенең гомере өзелде, берсе төрле дәрәҗәдәге тән җәрәхәтләре алды.

Ут элү очракларының 90 процентка якыны торак секторга туры килә. Күшке авыл җирлегендә 5, Зур Фроловога кергән авылларда – 4, Ырыңгы җирлегендә – 3, Буада 10 янгын чыкты.

Янгыннарның төп сәбәпләре ут белән саксыз эш итүдән (11 очрак), электр җайланмаларын монтажлау һәм эксплуатацияләү кагыйдәләрен бозудан (10 очрак), ягу мичләренең төзексезлегеннән һәм дөрес эксплуатацияләмәүдән (5 очрак), балаларның ут белән шаяруыннан (6 очрак) гыйбарәт. 3 ут төртү очрагы да теркәлде. Өстә язылганнардан күренгәнчә, барлык янгыннар диярлек кешеләрнең үзләренең ваемсызлыгы, янгынга каршы кагыйдәләрне үтәмәве аркасында килеп чыккан. Кызганыч, моның ахыры аяныч тәмамлана шул.

Инде ничәнче кат ут белән сак булыгыз дип кисәтәбез һәм ут элгән очракта кичекмәстән 01(112) яисә 3-28-72 телефон номерларын җыеп, янгын частена хәбәр итүегезне, төгәл адресыгызны, янучы объектны атавыгызны сорыйбыз. Янгын сүндерүчеләр тизрәк килгән саен зыян азрак булачак.

Р. Юнысов, Буа районы буенча күзәтчелек эшчәнлеге бүлекчәсе начальнигы.

БАРЛЫК ЯҢАЛЫКЛАРНЫ УКУ