Хәвеф-хәтәрсез Яңа Ел! Хөкүмәт Йортында озак бәйрәм көннәренең комплекслы иминлеге мәсьәләләре турында фикер алыштылар
Татарстан Республикасы Гадәттән тыш хәлләрне кисәтү һәм бетерү һәм янгын куркынычсызлыгын тәэмин итү комиссиясенең бүгенге план утырышы Яңа ел һәм Раштуа бәйрәмнәрен уздыру чорында халыкның комплекслы иминлеген тәэмин итү темасына багышланды. Утырышта Татарстан Республикасы Премьер-министрының беренче урынбасары Рөстәм Нигъмәтуллин, Россия гадәттән тыш хәлләр министрлыгының Татарстан Республикасы буенча Баш идарәсе башлыгы эчке хезмәт генерал-лейтенанты Рафис Хәбибуллин, шулай ук Татарстан Республикасының барлык кызыксынган министрлыклары һәм ведомстволары җитәкчеләре катнашты.
Утырышны ачып, Рөстәм Нигъмәтуллин билгеләп үткәнчә, республика халкы һәм балалар өчен кышкы каникуллар белән озын Яңа ел бәйрәмнәре – бәйрәм, ә гадәттән тыш хәлләрне кисәтү һәм бетерү буенча республика системасы өчен – киеренке көннәр.
Ел саен республика сулыкларында кешеләрнең боз астына китү очраклары теркәлә. Агымдагы чор башыннан бирле 6 һәлакәт теркәлгән, 8 кеше коткарылган, 3 кеше һәлак булган.
Сүз биреләчәк барлык җитәкчеләрдән, идарә органнарының, көчләрнең һәм чараларның, шулай ук ведомство карамагындагы объектларның бәйрәмнәрне куркынычсыз үткәрүгә әзерлегенә мәҗбүри рәвештә бәя бирүләрен сорыйм, - дип белдерде Татарстан Республикасы ГХКЯК Рәисе.
Аннары нотык белән Татарстан Республикасы буенча Россия ГТХМ Баш идарәсе башлыгы урынбасары Константин Чанышев чыгыш ясады.
Ул хәбәр иткәнчә, агымдагы елда республикада 5904 янгын булган, аларда 164 кеше һәлак булган, 197се төрле дәрәҗәдәге тән җәрәхәтләре алган. Бер ай эчендә янгыннарның һәм аларда һәлак булган кешеләрнең уртача саны бу чорда күпьеллык гадәти уртача күрсәткечләрдән бер ярым тапкырга артып киткән.
Шулай итеп, хәзерге вакытта торак пунктларда кешеләр күп була торган объектларда һәм торак биналарда янгыннарны профилактикалауга төп көчләрне тупларга кирәк.
Моның өчен билгеле бер эш башкарылды инде.
Янгын куркынычсызлыгы таләпләрен үтәү кысаларында гражданнар тарафыннан пиротехник эшләнмәләрне куллану барышында республикада 775 җайлаштырылган мәйданчык булдырылган.
Әлеге мәйданчыклар гражданнар тарафыннан көнкүреш пиротехника әйберләрен кулланганда куркынычсызлык чараларын үтәү буенча мәгълүмат стендлары һәм инструкцияләре белән җиһазландырылырга тиеш.
Докладларны тыңлаганнан соң, Татарстан Республикасы буенча Россия ГТХМ Баш идарәсе башлыгы, эчке хезмәт генерал-лейтенанты Рафис Хәбибуллин муниципаль район һәм оешма җитәкчеләренә автоном янгын хәбәрчеләре урнаштыру эшен дәвам итәргә тәкъдим итте.