Яшел Үзән янгын сүндерү һәм коткару гарнизонында яшь сучыларны һәм СКҖ активистларын бүләкләделәр
Чараны 8 янгын сүндерү һәм коткару отрядының актлар залында, барлык санитар-эпидемиологик таләпләрне һәм куркынычсызлык нормаларын үтәп, оештырдылар. Беренче чиратта, тантананың иң төп сәбәпчесе – тренер Далина Вавилованы бүләкләделәр, ул Яшел Үзән укучылары командасын «Яшь сучы» Бөтенроссия ярышларында катнашырга әзерләгән. Татарстан Республикасы буенча Россия ГТХМ Баш идарәсе башлыгы Далина Вавилова исеменнән Мактау грамотасын Яшел Үзән янгын сүндерү һәм коткару гарнизоны башлыгы Зөфәр Хәлиуллин тапшырды.
СКҖнең Яшел Үзән бүлеге хезмәткәрләрен дә билгеләп үттеләр. Су объектларында куркынычсызлыкны арттыру өлкәсендә актив эш алып барганнары өчен Владислав Киселев һәм Ринат Төхвәтуллинга Рәхмәт хатлары тапшырылды. Ә менә Павел Андреев һәм Андрей Масловны 2020 елның 4 мартында Идел елгасы акваториясендә бәла-казага юлыккан балыкчыны коткаруда аңлы гамәлләре һәм ярдәме өчен ТР буенча Россия ГТХМ Баш идарәсе башлыгының Рәхмәт хатлары белән бүләкләделәр.
Зөфәр Хәлиуллин чарада катнашучыларның барысына да актив тормыш позициясе өчен рәхмәт белдерде, бәйрәмнәр белән котлады һәм барысына да нык сәламәтлек, тынычлык һәм яңа 2021 елда иминлек теләде.