Бөтендөнья гражданнар оборонасы көне: Чаллы укучылары янгын сүндерүчеләрнең экипировкасын киеп карадылар
Яр Чаллының 54- нче янгын сүндерү һәм коткару бүлегендә берьюлы ике юбилей көне кысаларында ачык ишекләр көне узды: быел Россия гадәттән тыш хәлләр министрлыгына 30 ел тула һәм 25 ел элек Татарстан Республикасы Гадәттән тыш хәлләр министрлыгы төзелде. Мондый чараны 1 март - Бөтендөнья гражданнар оборонасы көненә туры китереп, Чаллы янгын сүндерүчеләре Яр Чаллы «Бөтенроссия ирекле янгын җәмгыяте»бүлекчәсе белгечләре белән бергә үткәрделәр.
77-нче номерлы гимназиянең башлангыч сыйныф укучылары өчен янгын саклау музее буйлап мавыктыргыч экскурсия үткәрелде. Бина күргәннәре турында җанлы фикер алышкан балаларның күңелле тавышына күмелде.
- Балалар төрле техника белән таныштылар һәм янгын сүндерүчеләр һөнәре , аларга нинди авырлыклар белән очрашырга, кыю булырга туры килә - шулар турында сөйләүне тыңладылар - дип хәбәр итте 72 нче янгын сүндерү һәм коткару бүлеге башлыгы ярдәмчесе Камил Ганиев. – Алар зур кызыксыну белән янгын машинасын карап чыктылар, аның кабинасында утырдылар.
Янгын сүндерүче-коткаручы Айрат Исмәгыйлев балаларга хәрби амуницияны: ут яклаучы шлем-каскалар, кием, йөз саклау щитогын киеп карарга, янгынны сүндергәндә һәм кешеләрне коткарганда кулланыла торган аппаратларны үрнәк итеп күрсәтергә ярдәм итте.
Моменттан файдаланып, яшь чаллылыларга ни өчен «шырпы - балаларга уенчык түгел» икәнен аңлаттылар, ут белән уен бик куркыныч һәм янгын вакытында үзеңне ничек тотарга кирәклеген аңлаттылар һәм ашыгыч хезмәтләрнең номерларын искә төшерделәр.
Мондый танып-белү чаралары Яр Чаллы шәһәре һәм Тукай муниципаль районы мәктәпкәчә учреждениеләрендә тәрбияләнүчеләр һәм мәктәп укучылары арасында традициягә әйләнде. Алар бик мөһим һәм янгын сүндерү хезмәте белән таныштыру гына түгел, ә героик һөнәр вәкилләренә хөрмәт хисе тәрбияләү максаты белән үткәрелә