Сигезенче сыйныф укучылары өчен куркынычсызлык дәресе
Яшел Үзән Гадәттән тыш хәлләр министрлыгы хезмәткәрләре шәһәрнең һәм районның мәгариф учреждениеләрендә иминлек дәресләрен үткәрүне дәвам итә. Чираттагы дәресне Яшел Үзән янгын сүндерүчеләре “Янгын белән йорт шартларында һәм җәмәгать урыннарында янгын сүндерү чаралары кулланып янгынга каршы көрәш кагыйдәләре” темасына багышладылар һәм аны 11 нче урта мәктәпнең 8 нче сыйныф укучылары өчен үткәрделәр.
8 нче янгын сүндерү-коткару отрядының өлкән инспекторы Резеда Йосыпова мәктәп укучыларына янгын белән бәйле вәзгыять, аларның барлыкка килү сәбәпләре турында сөйләде, куркынычсызлык кагыйдәләрен үтәмәү аркасында килеп чыккан янгыннарның чын мисалларын китерде. Алга таба алар белән бергә Гадәттән тыш хәлләр министрлыгы хезмәткәрләре янгын чыккан очракта, мәктәптә яки башка иҗтимагый урында барлык гамәлләр алгоритмын җентекләп сөйләштеләр.
Балаларга порошок янгын сүндерү җайланмасын күрсәттеләр һәм аны зур булмаган янгын чыкканда ничек кулланырга икәнен аңлаттылар.
53 нче янгын сүндерү-коткару бүлегенең өлкән янгын сүндерүчесе Глеб Якимов янгын сүндерүчеләрнең янгын сүндерү-техник коралланышы турында сөйләде. Ул янгын сүндерүчеләрнең сугышчан киемнәрен күрсәтте һәм аның билгеләнешен аңлатты. Теләүчеләр хәтта үзләре дә "сугышчан"ны киеп карый алганнар. Шул ук вакытта, хәрби киемнәрне тизлеккә кияргә батырчылык итүчеләр арасында кызлар малайларга караганда да күбрәк булып чыкты.